O Concello de Boiro habilitou no seu espazo de Youtube o pleno deste xoves 8 de outubro, unha sesión ordinaria que contou con dúas ausencias (as de Carlos Ansoar, do BNG, e Beatriz Deus, do PP) e que comezou coa aprobación da xuntanza previa do 10 de setembro (por unanimidade) e coa retirada dun punto relativo aos dereitos dos animais (unha proposta para impulsar a recollida de animais abandonados e outras cuestións a prol da súa protección) que non puido prosperar por “fallos de redacción”. Tamén se acordaron os días festivos locais para 2021 e aprobouse (con 9 nove votos a favor, os do PSOE, BNG, Boiro Novo, IC Boiro e Ciudadanos, e as abstencións do PP) unha moción de IC Boiro – Mixto en relación á instalación de alumeado e pintado de pasos de peóns na estrada AC-305, co fi de mellorar a seguridade neste viario.
Igualmente, deuse o visto bo (coas abstencións do PP e do BNG e cos votos a favor dos grupos restantes) a unha moción relacionada co Centro de Saúde de Saltiño, ao tempo que se aprobou por unanimidade unha proposta do BNG para a construción de beirarrúas en Ferreiros.
O Partido Popular presentou en pleno unha moción para instar á aprobación dunha lei que garanta o dereito constitucional da propiedade privada e combata eficazmente a ocupación ilegal de vivendas. Foi denegada cos votos a favor do PP e co rexeitamento do PSOE, o BNG, Boiro Novo e IC Boiro. Ciudadanos abstívose neste punto.
Por último, saíu adiante por unanimidade a proposición dos socialistas relativa aos custos nos gastos de limpeza e desinfección nos centros educativos do concello.
