Co fin de seguir loitando contra a brecha tecnolóxica agravada pola crise sanitaria (unha situación que demanda recursos e coñecementos para traballar e formarnos en remoto que non todas as persoas están en disposición de acadar), a Concellaría da Igualdade da Pobra do Caramiñal vai organizar un obradoiro para mulleres titulado Dixitalizad@s. Eliminando a fenda dixital de xénero e previsto para o mes de novembro (2, 4, 6, 9, 11, 13, 16 e 18), en horario de 10.00 a 12.00 horas, na aula de estudo situada no andar superior da Biblioteca Municipal.
O obxectivo deste taller práctico-teórico é formar ás mulleres locais en diferentes aspectos prácticos da vida cotiá que precisan da tecnoloxía, especialmente aqueles que requiren da relación coa Administración Pública. Neste senso, o programa estrutúrase en sete sesións: Como me preparo para facer trámites dende o meu ordenador, Que é un certificado dixital e outros sistemas de acceso á sede electrónica, Trámites coa Seguridade Social, Trámites co Ministerio de Xustiza, Trámites co Concello da Pobra do Caramiñal, Trámites coa Axencia Tributaria e Redes sociais.
Trátase dunha actividade de balde e as prazas son limitadas, polo cal as persoas interesadas deberán realizar a súa inscrición a través do enderezo electrónico igualdade@apobra.gal ou do teléfono de contacto 981 832 764, marcando a extensión 2206. A acción está financiada pola Secretaría Xeral da Igualdade e a Unión Europea.
