O Concello de Boiro, a través do departamento de Cultura, retoma a actividade do Club de Lectura da Biblioteca Municipal de Boiro. A xeira literaria deste mes vai xirar arredor de A arte de trobar do escritor galego Santiago Lopo. O vindeiro mes lerase e comentarase Malaherba de Manuel Jabois.
O obxectivo do Club é incrementar o pracer da lectura ao compartilo con outras persoas que, unha vez ao mes, se reúnen para comentar o libro lido.
Nas xuntanzas mensuais debatese sobre o estilo literario, os personaxes… e mesmo sobre as experiencias persoais dos participantes.
Os libros poden collerse na Biblioteca de Boiro, na Casa da Cultura, a partir deste mércores 7 de outubro. O Concello lembra que “para respectar os protocolos de prevención da COVID-19, as prazas para participar no Club son limitadas e as inscricións poden facerse de xeito presencial na biblioteca, no teléfono 981 84 84 10 ou no enderezo electrónico boiro.rbgalicia@eidolocal.es”.
