Outubro segue achegando en Boiro citas culturais que marcar no noso calendario. Este venres 16, sen ir máis lonxe, a Casa da Cultura vai acoller o espectáculo de contacontos As pitas baixo a choiva, de Ghazafelhos Teatro. Trátase da historia de Ludivina e Tereija, que son dúas pitas que viven no curral da Barreira e que están a devecer pola visita de Ricardiño, que é o neno que vén xogar con elas, cousa que periga por mor da choiva, xa que o neno tolea cando chove e persegue as pitas até pechalas no curral.
O espectáculo é unha adaptación do conto de Ricardo Carvalho Calero do mesmo nome. O elenco está formado por Pablo Sánchez “Pablísimo”, e o guión e a dirección corre a cargo de Pepablo Patinho. A cita infantil está programada para as 20.00 horas do día 16. O Concello lembra que as prazas son limitadas e que as entradas poden conseguirse na Casa da Cultura, o mesmo día do espectáculo a partir das 16.30 horas.
O venres 23 de outubro proseguen as historias para nenas e nenos da man de Avento Teatro, que representarán O mazo de Oz na Casa da Cultura de Boiro, a partir das 20.00 horas. Novamente as prazas serán limitadas por mor da actual situación sanitaria. As entradas poden conseguirse na Casa da Cultura, no mesmo día do espectáculo a partir das 16.30 horas.
O sábado 24 de outubro temos unha cita coa música. Será grazas ao concerto de Manuel Astray, local Leñaverde do Centro Social de Boiro a partir das 20.30 horas. A reserva de entradas pode facerse a través do enderezo electrónico reservacultura@boiro.gal. Manuel Astray é un músico local que se deu a coñecer nas redes sociais durante o confinamento, onde conseguiu importantes éxitos de audiencia coas súas contribucións ao rap (por exemplo superando co tema 22:22 as 80.000 reproducións en Youtube).
