A Asociación de Empresarios de Ribeira, en colaboración co Concello, activa este 15 de outubro unha innovadora e rechamante campaña para impulsar as vendas nos establecementos locais e reivindicar o comercio de proximidade nuns tempos, estes que estamos a vivir, no que se fai máis que preciso ca nunca o apoio da cidadanía. A campaña Compra no comercio local e paga en pesetas consiste precisamente niso: en facer un chamamento para que apoiemos ao noso comercio ao tempo que rende homenaxe á moeda que nos acompañou antes da chegada do euro e que, para moitas e moitos, simboliza uns saudábeis hábitos de compra que nada teñen que ver con acudir por sistema ás grandes superficies. A campaña remata nunha data significativa: o 30 deste mes, ou sexa, xusto un día antes de que remate o prazo para cambiar pesetas por euros no Banco de España.
Por estes motivos, a Asociación de Empresarios quere facilitar ós clientes a posibilidade de mercar con pesetas nos establecementos que participan nesta campaña e así dar uso ás históricas moedas que a veciñanza aínda poida ter gardadas.
Segundo informou a asociación, será ela mesma a que se encargue de trocar as pesetas por euros aos comercios, carrexándoas ao Banco de España para canxealas por euros.
Nesta campaña participan 25 establecementos asociados, pero o prazo para adherirse segue aberto, polo que se convida a máis tendas a participar. Na iniciativa toman parte activa diversos sectores: compañías de seguros, talleres de vehículos, comercios de roupa, establecementos de hostalería, concesionarios….