Finalmente os grandes protagonistas da edición duodécima da Volta a Ons, organizada o sábado 26 de setembro polo Club Náutico Arousa Norte da Pobra do Caramiñal, foron os veleiros Chispetrén, Cámping Ría de Arousa e Piko Norte.
Amais destas embarcacións e as súas tripulacións, a regata, que foi patrocinada por Atlantic Dental Institute e a Clínica Gonzalo López Castro, tivo outros protagonistas principais: a choiva e o vento (do suroeste, cunha intensidade que oscilou entre os 8 e os 14 nós). Tendo en conta estes condicionantes, a frota tomou a saída cun atraso de case unha hora por mor da inestabilidade do vento na enseada pobrense.
Na clase ORC A, o Chispetrén, de Jesús Iglesias, do Club Náutico Arousa Norte, impúxose finalmente liderando a regata desde os primeiros impases, cruzando primeiro a liña de chegada en tempo real situada na punta do porto comercial pobrense. Tras navegar as 26 millas do percorrido, a diferenza de 9 minutos bastoulle para imporse tamén en tempo compensado ao Moucho de Daniel Ayaso, do CN de Ribeira.
Na ORC B o triunfo final foi para o Cámping Ria de Arousa de José Manuel Pombar, que despois dunha espectacular saída, viuse pelexando co Ziralla de Ramón Barreiro durante toda a proba. Os 10 minutos de vantaxe do Ziralla en tempo real non foron suficientes e tiveron que conformarse coa segunda praza. Terceira foi a embarcación ribeirense A Píllara de José Ben.
Na terceira das categorías, a ORC C, realizouse un percorrido acurtado dunhas 18 millas. A vitoria foi a parar ao CN Boiro co Piko Norte, patroneado por Jose Manuel Castro, segundo, por escasos 3 minutos foi outro barco do mesmo club, Orlando, de Vitoria Facal, que sorprendía cunha espectacular regata e a terceira posición foi para o presidente do CN de Ribeira, Xosé Luís Torres Colomer e o seu Arousa VI.
