Outes albergou a cuarta proba do Campionato Galego Inclusivo de Motonáutica, cita deportiva na que os noieses José Barrio e Pilar Sarmiento seguen á fronte da clasificación xeral ao facerse co trofeo coruñés, ao que chegaban como líderes absolutos.
A falta da última xornada, pendente de disputarse en Tomiño a próxima fin de semana, dependendo das condicións meteorolóxicas, Barrio e Sarmiento foron cautos no desenvolvemento do percorrido trazado hoxe en Outes, para non perder a cabeza da listaxe xeral como titulares do mesmo, inmaculados en velocidade no slálom cronometrado, incluídos os exercicios de rescate con bichero e encestado de pelota sobre cubo flotante.
A segunda praza adxudicáronlla os tudenses Carlos Estévez e Oswaldo Davila, a tan só dous puntos dos líderes, sendo terceiros os vigueses Álvarez Camiña e Davila Piñeiro, algo máis distanciados.
As augas do porto do Freixo foron o marco elixido para a celebración desta cuarta proba, utilizando o pantalán do Centro Náutico como zona para o embarque de pilotos e axiliares.
Precisamente a entrega de premios celebrouse no propio Centro Náutico do Freixo, presidido o acto polo Alcalde de Outes, Manuel González, acompañado polo presidente da Federación Galega de Motonáutica, José Fernández, o concelleiro de deportes, Daniel Rodríguez, e o técnico deportivo Alejandro Pombo.
