O Concello de Porto do Son e a Deputación da Coruña (a través da súa Rede Cultural) levaron este sábado 26 á Casa da Cultura sonense a representación de Bernarda (Vilalba 1975), espectáculo da compañía Malasombra Producións baseado no texto orixinal de Jose Prieto, que tamén é director da adaptación teatral.
A cita, que podemos ver reflectida nun completo álbum fotográfico publicado nas redes sociais polo Concello de Porto do Son, veu acompañada das máis estritas normas de seguridade e distanciamento, o que non impediu que fose un éxito de público malia vir co consabido aforamento limitado. O elenco estivo integrado por Celia González, Luisa Merelas e Esther Aja.
Bernarda, cualificada pola compañía como “un drama con humor para público adulto” é unha obra de 75 minutos que relata a vida das dúas fillas xemelgas dunha muller chamada Bernarda, que fica viúva o mesmo día en que morre o ditador Franco. Bernarda, ante este panorama de dupla desgraza, decreta o estado de loito.
