A Área de Cultura do Concello de Rianxo vén de compartir con nós a axenda cultural rianxeira para este remate de setembro. Este sábado de setembro inaugúrase na sala de exposicións do Auditorio unha mostra que estará habilitada até o 24 de outubro, a exposición Arte Naive, que xunta parte da obra pictórica da artista holandesa afincada en terras rianxeiras Karin Kuijper. A inauguración da mostra está prevista para as 12.00 horas.
Na mesma xornada e no mesmo lugar (o Auditorio), aínda que a diferente hora (a partir das 20.30 horas) a agrupación Excéntricas e o autor da nosa comarca Quico Cadaval representarán Medida x Medida, adaptación baseada na obra do mesmo nome do dramaturgo inglés William Shakespeare. Baixo a dirección de Quico Cadaval, o espectáculo está protagonizado por Melania Cruz, Evaristo Calvo, Víctor Mosqueira, Patricia Vázquez, Josito Porto, María Costas, Santi Romay e Bernardo Martínez. O Concello confirmou que as entradas para Medida x Medida levan varios días esgotadas.
