O Concello de Lousame organiza este domingo 4 de outubro o Festival de Novo Circo, unha iniciativa que xunta dous espectáculos de clown: por unha banda Peter Punk e o neno imperdible e pola outra Hell Brothers, da man de Peter Punk e Cirkompacto, respectivamente. Ambas actuacións terán lugar no Polideportivo Municipal de Lousame, ás 18.30 e 19.30 horas.
A concelleira de Cultura, Silvia Agrafojo, fixo saber que “estamos ante unha oportunidade para desfrutar toda a familia de dous importantes grupos do novo circo, xa non baseado en animais pero que mantén o seu humor e as actuacións de clown, acrobacias e malabares”. A entrada é totalmente de balde, se ben o aforo é limitado, debido á aplicación dos protocolos contra a COVID-19, polo que é preciso reservar entrada chamando ao 981 825 780.
As actuacións darán comezo ás 18.30 horas con Peter Punk e o neno imperdible, un espectáculo no que Isaac Rodríguez Miranda interpretará a Peter Punk, un pallaso pillabán e irreverente que nesta ocasión compartirá escenario co músico Brais das Hortas. Durante unha hora, ambos actores combinarán humor, equilibrios e música de ata seis instrumentos diferentes: guitarra eléctrica, guitarra portuguesa, acordeón, harmónica…
Ás 19.30 horas, Iván Casanova e Malala Ricoy converteranse nos Hell Brothers, un espectáculo de clown, humor e acrobacias excéntricas. Un espectáculo de 50 minutos no que Iván e Malala representarán a Rejhuz e Glakghs Setén, os fillos do Demo que son expulsados do inferno para que aprendan a facer o mal por eles mesmos. Un divertido espectáculo a cargo de Cirkompacto, compañía de recente creación.
O Festival de Novo Circo é un espectáculo organizado polo Concello de Lousame, que conta coa colaboración da Xunta de Galicia, Gadis e o Xacobeo 2021.
