O Concello de Rianxo presentou a oferta deportiva para a tempada de inverno 2020/21, incluíndo as organizadas de xeito directo polo Servizo de Deportes, as escolas de formación dos clubs cos que colabora o Concello e as propostas da Piscina Municipal. Segundo informa o Goberno rianxeiro, “é unha oferta adaptada aos tempos que discorren, marcados polas restricións e as medidas de prevención para garantir a seguridade na práctica deportiva”. Isto reflíctese na presenza no programa de actividades e modalidades deportivas (individuais e colectivas) que garanten a distancia entre os participantes. Porén, malia estas limitacións, que tamén se poñen de manifesto nunha redución da oferta, o obxectivo do Concello é abranguer a maior cantidade de poboación.
O programa caracterízase tamén por vir descentralizado, con propostas para todas as parroquias rianxeiras, “co obxecto de achegar o deporte a todos/as, en especial a aqueles que mais dificultades teñen de mobilidade (neno/as e terceira idade)”.
As actividades para crianzas son modalidades deportivas ás que se pode acceder nos pavillóns municipais (2 escolas deportivas: tenis e patinaxe), na Piscina Municipal e a través das escolas de formación dos clubs rianxeiros (6 modalidades: piragüismo, remo, baloncesto, xadrez, voleibol e artes marciais mixtas). Estas iniciativas son as que de momento inician o curso, estando á espera do que aconteza co fútbol.
En canto ás actividades para adultos e terceira idade, as persoas interesadas poderán escoller entre 20 propostas diferentes, que van desde o multifitness e o tenis nos pavillóns municipais a unha ampla oferta de iniciativas acuáticas (pool dance, pool salus…) e dirixidas (cross, pilates, step, be hipopresivos…) na Piscina Municipal.
Asemade, mantéñense os grupos de ximnasia para a terceira idade en todas as parroquias do concello.
O prazo de inscrición abriu o xoves 17 de setembro e as actividades darán comezo o 5 de outubro.
Para máis información e inscricións cómpre que nos poñamos en contacto co Servizo de Deportes e nos Pavillóns Municipais.
