O Concello de Boiro está a traballar arreo coas direccións dos centros docentes do termo municipal para ter prontas, preparadas e seguras as aulas de cara ao inicio do curso. Ao abeiro destes labores, a edil de Educación, María Outeiral, reuniuse nas últimas semanas cos equipos directivos de todos os centros educativos de Infantil, Primaria e Secundaria para coñecer as necesidades de cada un e ultimar os protocolos de seguridade a seguir.
“Desde o Concello fixemos todo o que está na nosa man para o acondicionamento dos centros de ensino. Fai meses que temos solicitada unha xuntanza coa Consellería de Educación para afrontar aquelas actuacións que as direccións demandan e competencia da Administración autonómica”, afirma a concelleira, engadindo que se están a perfilar cos colexios e institutos as demandas pendentes e facendo avanzar os protocolos para o inicio do curso (cubrindo as necesidades en canto a desinfección, limpeza e material de protección). “Os centros están afrontando as medidas de seguridade tendo en conta os protocolos que lles indica a Administración autonómica”, explicou, anunciando que os días vindeiros “darase conta das necesidades que se presenten á Consellería de Educación e agardamos o seu apoio co Concello e cos centros de ensino para levalas a cabo”.
