O Concello de Boiro ofrece un novo curso de servizos de bar e cafetería, correspondente ao plan de Acción Formativa para Desempregados (AFD). A actividade formativa impartirase entre os meses de outubro e abril no Centro de Formación de Espiñeira. Terá unha duración de 658 horas de duración.
O Goberno boirense lembra que os cursos AFD están indicados para mozos e mozas menores de 30 anos á procura dun posto de traballo. Para inscribirse neste curso de formación é preciso ter o grao en Educación Secundaria (ESO), ciclo medio de FP, Competencias Clave nivel 2 ou proba de acceso a ciclos.
Respecto da actividade formativa sobre servizos de bar e cafetería, desenvolverase no Centro de Formación e Viveiro de Empresas, situado no Polígono Industrial de Espiñeira, en horario de luns a venres de 16.00 a 21.00 horas. Ademais da formación específica na modalidade de servizos de bar e cafetería, o curso consta dun módulo transversal no que o alumnado recibirá formación sobre inserción laboral, sensibilización medioambiental e tamén formación para a igualdade.
Pode consultarse toda información sobre este curso e inscribirse nel no Servizo de Orientación Laboral do Concello de Boiro, de maneira presencial no primeiro andar da Casa Consistorial, a través do enderezo electrónico orientacion.laboral@boiro.org ou o teléfono 981 84 26 09.
