Tres persoas resultaron feridas de diversa consideración nunha colisión por alcance rexistrada esta tarde na Pobra. O suceso produciuse na vía que une os xardíns de Valle-Inclán co aparcamento da chaira portuaria.
Un vehículo parouse diante do paso de peóns para deixar atravesar a uns peóns, e o automóbil que lle seguía non se decatou e chocou con el. As dúas persoas que ían neste segundo turismo tiveron que ser trasladadas en ambulancia ao hospital de Barbanza porque se queixaban de varias dores en bonecas e o pescozo.
Tamén o ocupante do primeiro turismo presentaba unha lixeira dor na zona cervical, pero o seu estado era leve. Ata o lugar acudiron efectivos da Policía Local de Protección Civil da Pobra, ambulancia e os bombeiros de Ribeira que limparon a zona.
