A adaptación dos centros de ensino aos protocolos covid con motivo da súa apertura a partir de mañá está repercutindo nalgunhas competencias do
Concello relacionadas con tráfico, obras e o servizo de limpeza de interiores, sempre baixo a coordinación da Concellería de Educación.
Así, no que se refire á circulación (e ademais de velar pola seguridade viaria en xeral regulando os horarios de entrada e saída nos distintos centros educativos) cómpre destacar dous medidas concretas:
Por unha parte, mañá xoves e pasado mañá venres, entre as 8.45 e as 9.15 horas, non estará permitida a circulación de vehículos pola travesía Canarias coa fin de facilitar o acceso ao CEIP O Grupo a través da porta traseira coincidindo coa media hora de entrada do alumnado.
Por outra parte, vaise reservar a explanada de aparcamento situada xunto ao IES Número 1 en Coroso para actividades de recreo en días lectivos (en horario de 10 a 13 horas): unha medida que se prolongará ao longo do curso cando menos mentres dure o bo tempo.
A incidencia do covid-19 tamén afecta a actuacións realizadas en colexios por parte da brigada municipal de obras. Así, no CEIP O Grupo construíuse unha rampa accesible e conducente a unha das portas do patio no ánimo de facilitar a separación do alumnado (cómpre informar a maiores que tamén se están efectuando efectuaron traballos de reforzo do muro posterior). E no que respecta ao CEIP de Olveira, colocouse plaqueta no baixo-cuberta do edificio para poder utilizar este espazo.
Outras obras efectuadas pola brigada foron a reforma dun baño de infantil no CEIP Frións, a colocación de tarima en 5 aulas do colexio de Artes (á espera de remodelar o patio e ampliar o seu parque infantil cunha actuación adscrita ao Plan de Obras e Servizos da Deputación), a ampliación dun aula no colexio A Capela, o pintado da biblioteca e a colocación de tarimas no Heroínas de Sálvora de Aguiño, a instalación de tarimas tamén en Pé do Corniño ou a reforma do baño, subsanación de humidades e creación dun espazo axardinado no colexio de Deán.
Limpeza de interiores
Por último, cómpre informar de que se tomaron as medidas oportunas para reforzar a limpeza de interiores en cumprimento da normativa covid, incluíndo o horario do Plan Madruga.
