Setembro comeza con forza en Boiro, cunha manchea de actividades culturais. A axenda arrinca este xoves (xoves e venres) cunha clase maxistral de música urbana, na aula CeMIT de Boiro (Centro Social) en horario de 10.00 a 12.00 horas e 12.00 a 14.00 horas. Trátase dunha masterclass de creación musical encadrada no programa do Festival Urbano de Arte, que se vai desenvolver durante o mes de setembro. As prazas son limitadas, a inscrición para a actividade pode facerse no enderezo electrónico educacion@boiro.org.
O sábado a música urbana segue adiante cun Obradoiro de rap e grafitti, a partir das 18.00 horas na Boqueira de A Negral, a carón das pistas de skate. Esta actividade formativa tamén se insire no programa do Festival Urbano de Arte. Ao igual que no caso anterior, as prazas son limitadas, a inscrición para a actividade pode facerse no enderezo electrónico educacion@boiro.org.
O venres 4 de setembro haberá unha actividade específica para os máis pequenos, o espectáculo Soñando inventei, que representan María Faltri e Jorge Juncal na praza de San Roque en Cespón, a partir das 20.00 horas. Trátase dunha actividade musical para público infantil e familiar que aborda conceptos de concienciación e respecto relacionados coa diversidade de xénero. O aforo é limitado. A reserva de entradas pode facerse en reservacultura@boiro.gal ata o día 4 de setembro ás 13.30 horas.
Na xornada do sábado 5 novamente haberá marxe para o lecer infantil e xuvenil, da man da agrupación Pistacatro, que ofrece, a partir das 20.30 horas na contorna do Centro Social de Abanqueiro (se chove no interior), o espectáculo A vida tola de Pajarito, unha actividade de humor para todos os públicos. O aforo é limitado e a reserva de entradas pode facerse a través do enderezo electrónico reservacultura@boiro.org ata as 13.00 horas do día 5/09/2020 ou no momento da actuación por rigorosa orde de chegada.
