O Concello de Boiro ven de levar a cabo unha importante obra de
saneamento na rede de pluviais nos núcleos de Coroño e Teaño, así como a
mellora do pavimento. O alcalde de Boiro, José Ramón Romero; o concelleiro de Urbanismo e Obras, Luís Ruiz; e o arquitecto municipal, Emilio Piña, visitaron esta mañá as obras xa rematadas.
O coste da actuación ascende a 74.628,73 euros, con cargo ao POS 2019 da Deputación Provincial da Coruña. O resultado destes traballos é a eliminación de vertidos puntuais de augas negras que, ata o de agora,
chegaban ao rio Coroño, dando resposta a unha demanda de mellora de
servizos no rural, así como a mellora do pavimento para favorecer a conexión entre as aldeas da contorna.
No núcleo de Coroño ampliouse a rede de saneamento, realizando a
conexión a sete vivendas e deixando proxectado para as 12 parcelas
edificables que existen no lugar. En Teaño levouse a cabo a condución de
pluviais ao colector xa existente de augas limpas, eliminando os problemas de entradas de choiva no interior das vivendas.
Coa mellora de rede de saneamento en Coroño e Teaño elimínanse
vertidos puntuais que se producían no río, mellorando a calidade
medioambiental do curso do rio ata o estuario e renovase o firme dun tramo duns 700 metros de estrada, co que se favorece a conexión entre os veciños das diversas aldeas da contorna.
