A mala previsión meteorolóxica para este luns 21, festivo local na Pobra do Caramiñal, obrigou ao Concello a refacer o seu programa de actividades para as festividades do Nazareno, tomando a decisión de aprazar a actividade Cociñando nas prazas con Kike Piñeiro e Eloy Cancela (A Horta do Obradoiro) e consistente nunha demostración gastronómica (showcooking) e o posterior repartimento de tapas polos establecementos hostaleiros.
En total, estaba prevista a distribución de 920 petiscos, elaborados con produto local, nas propias mesas das terrazas dos locais inscritos (unha vintena na contorna de diversos espazos: praza Victoriano García Martí, praza de Maura, paseo dos Areos, praza Paulino Santos Mieites e praza Valle-Inclán) para que a degustación fose controlada.
A nova data na cal terá lugar esta cita aínda está por determinar ao depender da previsión do tempo.
