O Concello da Pobra do Caramiñal, a través da Concellaría dos Servizos Municipais, anunciou a vindeira posta en marcha de varias actuacións de mantemento e asfaltado nos vieiros municipais, unas tarefas que estiveron paralizadas por mor do Estado de Alarma e que, tal e como fixo saber este luns o alcalde, Xosé Lois Piñeiro, “tiveron que agardar até este mes de setembro malia que nunha situación normal xa estarían en marcha dende o pasado mes de maio”.
A edil dos Servizos Municipais, Estefanía Ramos, encargouse de detallar cales son as obras e o seu importe. Así, indicou, no pasado venres iniciouse a reparación dun camiño no lugar de Caíños, por 4.743’20 euros, coa limpeza e a nivelación das rasantes da superficie existente, a carga dos produtos sobrantes e o seu transporte ao vertedoiro, incluída a reparación de fochancas nas zonas en que sexa necesario cunha achega de recheo de grixo e o seu compactado para, a seguir, proceder co subministro, extensión e compactado dunha mestura bituminosa en quente tipo AC16 Surf 50/70 D, nun espesor de 5 centímetros, despois do rego de adherencia.
En catas vindeiras, sinalaron, acometerase o arranxo da vía que une as estradas AC-302 e Tarrío, cun custo de 8.379’25 euros, o cal comprende o fresado do pavimento en asfalto e o envío do sobrante a un vertedoiro autorizado; a protección de tapas con formigón coa adaptación á nova vía e o pavimento de aglomerado asfáltico en quente de 5 centímetros, de elaboración na planta, de composición densa D-20, con árido granítico; a extensión e compactado ao 98% do ensaio Marshall, inclusive regos de imprimación e adherencia.
Asemade, procederase á reparación do tramo final da rúa do Castelo coa súa conexión coa AC-305, por 7.569’15 euros, que inclúe o corte do pavimento cunha máquina disco, o fresado do pavimento en asfalto e o envío do sobrante a un vertedoiro autorizado, a protección con formigón para o asentamento da pedra, así como a nova colocación da reixa e pavimento de pedra similar á xa existente de 6 centímetros de espesor asentada no morteiro.
A seguinte intervención será o acondicionamento das pistas dos núcleos de Tarrío.
O alcalde e a edil explicaron que tódalas actuacións detalladas serán realizadas antes do día 31 de decembro do presente ano, ademais de que non se descartan outras a maiores en función do remanente de cada unha das partidas que recolle o orzamento municipal.
