A narradora Ana Facchini inaugura en Rianxo, este 7 de outubro, a Escola de Familias 2020

O programa da Escola de Familias 2020 do Concello de Rianxo, inserido dentro do Programa Apego, vén este outono con diversas actividades para os mércores dos meses de outubro, novembro e decembro. Segundo informa o Goberno local, a actividade da Escola de Familias, que se retoma agora logo de que tivera que cancelarse en abril por mor da alerta sanitaria, inclúe propostas diversas (contacontos, obradoiros, charlas, relatorios e recursos sobre saúde) para crianzas e familias. As actividades iranse publicando nas redes con varios días de antelación, debido a que o seu desenvolvemento se poderá ver alterado segundo evolucione a situación sanitaria.

A actividade de benvida á Escola de familias 2020 é unha sesión de contos, cantos e “outras animaladas” coa narradora oral Ana Facchini. Será o mércores 7 de outubro ás 17.30 horas, no Liceo Marítimo de Rianxo. Para participar nesta sesión de apertura hai que inscribirse previamente a través do seguinte correo electrónico: normalizacion@concelloderianxo.gal ​​​​​​​ onde haberá que indicar o nome da crianza, o nome da persoa acompañante e o número de teléfono. As prazas son limitadas.