O sábado 3 de outubro Rianxo estréase en Rianxo o espectáculo teatral O meu mundo non é deste reino, unha farsa de Manuel María interpretada polos actores Anxo García e Fran Lareu, baixo a dirección e dramaturxia de María Peinado. A peza, concibida pola compañía Teatro da Ramboia, representarase na Sala Arcos Moldes do Auditorio de Rianxo, a partir das 20.30 horas.
Está recomendada a un público maior de 14 anos. A entrada é de balde previa reserva en auditorio@concelloderianxo.gal (preferente) ou no teléfono 664 183 217, do 24 de setembro ao 1 de outubro de 9.00 a 13.30 h.
A actuación forma parte do programa Cultura no Camiño + da Axencia Galega das Industrias Culturais da Consellería de Cultura e Turismo da Xunta de Galicia.
A obra está baseada en Farsa de Bululú, Premio Abrente en 1973 e unha das máis representativas contribucións do noso teatro á loita anti-franquista. O presente proxecto, que foi vencedor do primeiro certame Manuel María de Proxectos Teatrais que organiza a Casa-Museo Manuel María, é unha versión libre da Farsa de Bululú, que recupera o título orixinal da peza (O meu mundo non é deste reino) e nos guinda unha historia actualizada, moi vixente, sobre unha parella de bululús que viaxa polas feiras coa súa teatro portátil para escenificar unha e outra vez a historia dun gran rei que toma as rendas dun reino, amparado baixo todo tipo de cómplices corruptos.
