O Concello de Lousame organiza este domingo 27 de setembro un espectáculo de maxia e dinamización lingüística. Trátase de Caldeirada de lingua, a cargo do mago Martín Camiña. Segundo informa o Goberno local, será unha actuación de balde na Casa da Cultura a partir das 17.30 horas. As entradas deberán reservarse previamente na propia Casa da Cultura ou chamando ao 981 825 780.
Caldeirada de lingua é un espectáculo de ilusionismo lingüístico, humor e participación do público. Durante aproximadamente 65 minutos, o ilusionista Martín Camiña, ben coñecido en Lousame pola súa participación en dúas edicións anteriores do Festimaxia, invocará o “conxuro da caldeirada” para recuperar a memoria do que somos e valorar o tesouro que supón dispoñer dunha cultura propia e dunha lingua de seu. Caldeirada de lingua é unha cita cultural para todos os públicos organizada polo Concello de Lousame en colaboración coa Deputación da Coruña.
