Unhas 200 persoas arrouparon a Mikel Erentxun na súa cita de Boiro

Boiro confirmou esta fin de semana, co concerto de Mikel Erentxun do sábado na Boqueira de A Negral, dúas cousas moi relevantes relacionadas co musical: que é unha vila referente en materia de escenarios e creación artística, e, tamén, que as medidas que se están a poñer marcha na nosa comarca para garantir a seguridade ante a COVID nas actividades culturais son a todas luces exemplares. O concerto de Mikel Erentxun, seguido por unhas 200 persoas dende as súas cadeiras debidamente distanciadas, foi un recordatorio disto e, tamén, de até que punto a cultura pode rexurdir ante tanta adversidade. Tocou, entre outros temas, Pidiendo pista, La vereda, Mañana, Veneno, Rozando la eternidad ou Imagino.

Un intre do concerto fotografado por Ramón Rey para Laganzua.net

Xa o dixo Suso Santamaría, xerente do local de concertos boirense A Pousada da Galiza Imaxinaria e organizador do concerto: “A música e a arte en xeral sempre serán un antídoto para calquera pandemia”. Santamaría aproveitou a publicación de diversas crónicas sobre a actuación para agradecer o importante traballo de todas as persoas que axudaron a facer posíbel a actuación e a “cumprir con todos os protocolos”, un traballo no que tamén se implicou de cheo o Concello, dando como resultado un concerto de calidade e enerxía que tivo continuidade musical, en directo e da man de Ortiga.