O Club Náutico e Deportivo de Ribeira, organizador da XIV Regata Gadis (PDF), confirmou a participación dunha vintena de embarcacións na gran cita veleira do Barbanza, que terá o seu top de saída este sábado ás 14.00 horas dende a contorna do porto da cidade. Segundo informou o Club, o evento deportivo acubillará sen dúbida “un bo nivel de competición”, non só polo prestixio das embarcacións e dos clubs participantes (Club Náutico Arousa Norte, Ro Yachts Club, Club Náutico de Rianxo, Club Náutico de Portonovo, Club Náutico de Boiro e o anfitrión do Deportivo de Ribeira) senón tamén pola axeitada compoñente meteorolóxica, que na súa previsión anuncia vento do nordés estábel de 10 nós, con picos de 15, “garantindo o espectáculo deportivo”.
Segundo informou o comité da Regata Gadis, barállanse até 12 percorridos alternativos, dependendo a súa elección en función do vento e a súa dirección á hora da saída, sendo o elixido finalmente, con toda seguridade, algún dos de trazado costeiro. A media roldará as 12 millas, un 22 quilómetros.
Os vencedores da edición de 2019 confirmaron a súa participación como o Chispetrén, de Jesús Iglesias, do Club Náutico de Rianxo na Clase Regata; o Cámping Ría de Arousa, de José Manuel Pombar, do Club Náutico de Boiro, en Cruceiro/Regata; ou o Somni, de Helmut Bande, do Club Náutico Deportivo de Ribeira, en Cruceiro. A entrega de premios celebrarase tras finalizar a proba deportiva, asistindo á mesma representantes do Club Náutico anfitrión, do Concello de Ribeira, da empresa patrocinadora (Gadis) e un membro do equipo de regatas de cada embarcación, seguindo as estritas normas de seguridade ante o COVID-19.
