O Xulgado do Social número catro de Santiago declarou nulo o despedimento dun traballador dun concesionario de Caeiro SA en Ribeira por ser candidato da CIG nunhas eleccións sindicais, polo que obriga á súa readmisión.
Según figura no fallo, con data do 29 de xullo de 2020, a empresa terá tamén que abonarlle os salarios de tramitación e recoñecerlle a súa condición de delegado sindical. Contra esta sentenza cabe presentar recurso de suplicación ante o Tribunal Superior de Xustiza de Galicia (TSXG). O traballador foi despedido o 19 de decembro de 2019 por unha “falta laboral”, xusto un día despois de presentarse pola CIG ás eleccións sindicais a celebrar en xaneiro de 2020.
O xuíz declara probado que a empresa “indagou” a través dunha comunicación con outro empregado sobre o ocorrido na asemblea do 18 de decembro para a presentación de candidaturas. Ademais, conclúe que queda acreditado que “non existe causa que xustifique o despedimento do traballador”. A Sala falla que “o despedimento constitúe unha represalia da empresa ao traballador por ser candidato no proceso electoral e, posteriormente, saír electo como representante legal dos traballadores”.
O cadro de persoal elixiu a este traballador como o seu representante nas eleccións sindicais de xaneiro. Este resultado foi impugnado pola empresa, pero un laudo arbitral confirmou a validez do proceso. Segundo a CIG esta “non é a primeira vez que a empresa recorre a presións ou represalias para impedir que saian elixidos os representantes da CIG, a favor de UXT”
