O Concello de Dodro mediante a Concellería de Cultura e Patrimonio presentou hoxe a primeira fase de sinalización de recursos turísticos, de patrimonio relixioso e de rutas literarias e arqueolóxicas. Son once puntos de información que se distribúen entre as tres igrexas, Santa María de Dodro, San Xoán de Laíño e San Xián de Laíño, tres capelas, San Amaro de Bexo, San Xosé de Imo e a capela da Virxe do Leite, a Cruz do Abelán, e tres rutas literarias e arqueolóxicas, “Os días olvidados”, “Pensa Nao” e “Ruta de Bustelo e Pozo Bastón” que inclúe información tamén do Cruceiro de Bustelo.
Por primeira vez o patrimonio cultural de Dodro vai estar sinalizado con paneis de aceiro cortén que inclúen unha información básica sobre o recurso e un código QR que enlaza coa páxina web https://www.obaixoulla.gal/ onde se pode ver a información con moito mais detalle. Agradecemos a presenza de Lucía Santiago Sanmiguel en representación deste catálogo dixital aberto.
.A Concellería de Cultura e Patrimonio de Dodro que dirixe Xoán Xosé Vicente Franco, quere por en valor o patrimonio de Dodro para conseguir que a veciñanza e a xente que nos visite coñeza os valores cos que contamos e así tamén poder conservar e protexer estes recursos, porque o que nos se coñece non se valora nin se coida. Nas seguintes fases procederase á sinalización do resto dos cruceiros mais antigos e con mais tradición oral, así coma fontes, lavadoiros, hórreos e recursos arqueolóxicos.
