A semana cultural de Boiro ofrece esta última finde de agosto unha completa axenda de teatro, danza e música tradicional. O venres 28 de agosto é a quenda das familias da man da compañía Tropa de Trapo, que achegará, no Lavadoiro de Bao, contos de nenas e grandes e pequenas para todos os públicos. Será ás 12.00 horas. No caso de chuvia, o espectáculo trasladarase ao local multiusos do Mercado Municipal. Segundo informa o Concello, o aforo é limitado e será necesario facer a inscrición previa no enderezo electrónico cabodecruz@boiro.org ata o xoves ás 13.30 horas ou no mesmo momento do espectáculo por rigorosa orde de chegada.
O mesmo día, o 28 de agosto, celebrarase ás 20.30 horas un espectáculo de ballet a cargo da Escola Cen Pliés da Asociación Amas de Casa de Boiro, na terraza da Casa Consistorial. As persoas interesadas terán que inscribirse previamente no enderezo electrónico asoamascasa@gmail.com.
A historia do primeiro matrimonio entre mulleres celebrado na nosa terra é o fío argumental de Elisa e Marcela, o espectáculo que ofrece A Panadaría o 28 de agosto na Casa da Cultura de Boiro, a partir das 21.30 horas. Será unha representación teatral para maiores de 12 anos. Novamente o aforamento será controlado e restrinxido. As entradas poden reservarse no enderezo electrónico cabodecruz@boiro.org ata o venres ás 13.30 horas ou no mesmo momento do espectáculo por rigorosa orde de chegada.
O domingo 30 será a quen da música tradicional coa nova edición do Serán con Xilbarbeira, a partir das 20.30 na aldea de Bealo. Será preciso, para acudir, facer a inscrición no enderezo electrónico cabodecruz@boiro.org ata o venres ás 13.30 horas ou no mesmo momento do espectáculo por rigorosa orde de chegada.
