O Concello de Boiro non vai facer unha aprobación definitiva da designación do areal de Piñeirón como praia para mascotas mentres non se
coñezan e estuden todas as alegacións da veciñanza. No pleno da corporación celebrado o pasado 23 de xullo aprobouse unha modificación inicial do Regulamento municipal de animais domésticos e salvaxes en catividade, que non se fará efectiva mentres non se valoren todas as reclamacións presentadas.
O Concello de Boiro é coñecedor do malestar da veciñanza e persoas
usuarias da praia de Piñeirón polo proxecto de converter este areal nun espazo permitido para o acceso e estancia de mascotas durante a época estival. Tras a demanda da veciñanza de destinar unha praia para mascotas no municipio, o pleno municipal debateu e aprobou unha modificación inicial do Regulamento de animais domésticos e salvaxes en catividade.
Despois da súa aprobación inicial no pleno da corporación, esta modificación do regulamento atópase agora nun proceso de exposición pública para a presentación de reclamacións e/ou alegacións por parte da veciñanza.
O Concello de Boiro non vai someter esta modificación do regulamento para a súa aprobación definitiva mentres non se coñezan e estuden todas as
demandas e propostas da cidadanía.
O borrador do texto pode consultarse na páxina web municipal e as reclamacións e/ou alegacións poden presentarse no Concello de Boiro a través do Rexistro Xeral ou da sede electrónica ata o vindeiro 15 de setembro.
Na actualidade, tal e como recolle o Regulamento de animais domésticos e salvaxes en catividade, non está permitida a circulación e estadía de mascotas en ningún dos areais do municipio durante a época estival, comprendida entre o 1 de xullo e 30 de setembro de cada ano.
Este venres recala en Boiro “Deadpan Karaoke” de Ibuprofeno Teatro
A Casa da Cultura de Boiro vai dar acollida este venres 26 de abril á representación teatral de Deadpan Karaoke, a cargo de Ibuprofeno Teatro, a partir das 21.00 horas. As entradas estarán á venda dende unha hora antes da función na billeteira. Trátase dunha peza para...