A Marea Cidadá de Noia anunciou a súa intención de traballar para que a xestión do Museo do Mar veña “dunha combinación de participación cidadá e apoio de persoal técnico e profesional”, uns modelos de gobernabilidade horizontal que, segundo apunta a agrupación, teñen demostrado dende hai décadas a súa efectividade en contextos e circunstancias moi diversas.
“O potencial que gardan as iniciativas cidadás e o coñecemento que veciños e veciñas teñen das realidades que lles interesan non poden quedar ó marxe da xestión do público”, explican dende a plataforma, engadindo que este é un dos motivos polos que aposta pola implantación da dita metodoloxía de xestión horizontal no Museo do Mar, “buscando a participación activa de asociacións como Mar de Noia, que teñen mostrado o seu coñecemento e seu enorme capital humano”.
A agrupación entende que a xestión directa por parte da cidadanía, “sempre coa colaboración e o asesoramento do persoal técnico e profesional pertinente”, é “a fórmula máis acaída para a toma de decisións neste tipo de espazos”.
