O verán en Porto do Son preséntase cargado de actividades, unha axenda descentralizada e diversa que se dirixe a facer compatíbeis as fórmulas máis atractivas para o público e os protocolos estritos de seguridade sanitaria. Esta semana o programa vén cargado de citas para subliñar. Este mércores 15 de xullo residentes e visitantes teñen unha cita co cinema con A ovella Shaun, que se proxecta na praza de España de Porto do son a partir das 22.00 horas. Pasado mañá, venres 17, será a quenda do espectáculo Música, maxia, sabor!, que se celebra ás 21.00 horas na praza do Curro de Portosín, da man de Teatro Culturactiva.
Ao día seguinte, sábado 18, está prevista unha actuación da Charanga O Santiaguiño de Padrón, ás 12.00 horas na praza de España en Porto do Son. O domingo 19 está programada unha sesión vermú na praza do Curro de Portosín, a cargo de DJ Geno. A cita será ao mediodía.
O Concello de Porto de Son, entidade organizadora destas actividades, lembra que a semana vindeira haberá novas propostas para marcar no calendario.
