O Grupo Municipal de Rianxo en Común, por medio do seu voceiro, Julián Bustelo, presentou unha moción para ser tratada en pleno relativa ás consecuencias que tivo o proxecto de rexeneración das praias de Rianxo levada a cabo hai máis dunha década, poñendo o foco nos areais da Torre, O Pazo, Quenxo, Tanxil e As Cunchas, e implicando, a maiores, a construción de catro espigóns co obxecto de reter a área aportada. Segundo indica a agrupación, malia que esta iniciativa tiña a finalidade de achegar recursos duradeiros para optimizar e reacondicionar os espazos costeiros do concello, o proxecto rematou por ter consecuencias negativas sobre os recursos marisqueiros da zona, tal e como advertiron no seu día a Confraría de Pescadores Virxe do Carmen e a Agrupación de Mariscadoras a Pé, e sobre todo a Asociación para a Defensa Ecolóxica da Galicia (ADEGA).
“Despois de máis dunha década dende a execución do proxecto, as posíbeis repercusións negativas que se advertían daquela convertéronse nunha realidade”, explica a agrupación que coordina Julián Bustelo, engadindo que “as praias obxecto da actuación, particularmente aquelas nas que se construíron os espigóns, convertéronse en zonas mortas dende o punto de vista marisqueiro, tal e como o teñen denunciado os responsábeis da Confraría de Pescadores de Rianxo”. A plataforma recorda que “nos últimos 5 anos invertéronse na rexeneración destas zonas preto de 50.000€, porén, estes esforzos resultaron en balde”.
Por todo o sinalado, Rianxo en Común propón os seguintes acordos:
1. Instar a Portos de Galicia e á Dirección Xeral de Costas a realizar un estudo relativo ás consecuencias da instalación dos espigóns para o sector pesqueiro de Rianxo.
2. Instar a Portos de Galicia e á Dirección Xeral de Costas a estudar unha alternativa para os actuais espigóns emprazados nas praias rianxeiras que permita a normal circulación das correntes.
3. Instar a Portes de Galicia e á Dirección Xeral de Costas a facer extensivos os puntos anteriores ao espigón de Neixón cuxos terreos adxacentes, se ben pertencen ao termo municipal de Boiro, son explotados pola confraría rianxeira.
