O cabeza de lista do PSdeG-PSOE pola Coruña e vicesecretario xeral do partido, Pablo Arangüena, estivo este venres en Noia para dar a coñecer os seus proxectos para a comarca e pacer fincapé nas principais necesidades económicas, sociais e medio ambientais da nosa contorna. Precisamente a cuestión ecolóxica-económica centrou boa parte da súa intervención, que xirou arredor da contaminación da ría de Noia, “un auténtico atentado ecolóxico e económico”.
Segundo fixo saber, o problema ambiental da ría “compromete gravemente non só os ecosistemas mariños, senón a riqueza que dá emprego directo a 1.650 persoas” no marisqueo e sostén a economía noiesa.
Pola contra, o candidato asegurou que “un futuro goberno socialista na Xunta mudaría esta situación coa posta en marcha dun ambicioso plan de saneamento das rías e ríos galegos que se fai explícito no noso programa”.
Pablo Arangüena remarcou que “20 años despois da aprobación da directiva marco de augas da UE, que obrigaba a depurar en todas as localidades de máis de 2.000 habitantes, un concello de 15.000 habitantes como Noia ten unha depuradora que funciona ao 20% e que verte directamente á ría, a 500 metros do banco marisqueiro. Un auténtico escándalo”, subliñou tras súa visita á EDAR.
Na súa estadía en Noia, Arangüena estivo acompañado por concelleiros e membros de agrupación socialista. O cabeza de lista puido comprobar o estado da praia de Testal, unha das dúas que ten o termo municipal, que, segundo lembrou, “está nun estado precario” e “leva pechada ao baño más de 5 anos por un alto nivel de contaminación que pon tamén en perigo os polígonos de berberecho veciños”.
