O PSdG-PSOE de Ribeira achegou unha nova proposta relativa ao saneamento de Corrubedo, para ser presentada ao vindeiro pleno da Corporación local. Trátase dunha moción para eliminar o punto de vertido de augas residuais da antiga tubaxe de desaugue da praia das Furnas, en Corrubedo. Segundo fai saber o grupo socialista, trátase dun problema que debera terse solucionado hai anos, sobre todo tendo en conta a existencia dunha nova depuradora (en punta Paxariñas) na vila operativa dende hai un lustro, con capacidade para dar servizo a unha poboación de 7.326 e cunha completa infraestrutura de oito bombeos de augas fecais até a EDAR con emprazamentos en Ribeira do Prado, Casa do Mar, Concheiro Alto, A Agra, Sirves, Artes, Oleiros e Escola de Oleiros.
En total, recordan, instaláronse 5.867 metros de impulsores, 10.965 metros de colectores, e un emisario submarino de 223 metros.
Segundo apunta o grupo socialista, se ben coa devandita obra deberán ficar solucionados os problemas de saneamento de Corrubedo, nas praia das Furnas, cando a marea está baixa, “para abraio dos residentes e visitantes, “, segue visualizándose a antiga tubaxe de desaugue das vivendas do barrio das Delicias, cos problemas medio-ambientais, estéticos, sanitarios que isto implica. Por este motivos, o grupo de José Vilas pide que se arranxe o punto de vertido para “melloras as condicións naturais da paisaxe e tamén da vida e o traballo da veciñanza do lugar”.
