Xa se pode escoitar online, no Youtube, a canción orixinal de A Illa das Mentiras, o filme de intriga de Paula Cons ambientado en Sálvora e co afundimento do buque Santa Isabel (en 1921) como pano de fondo principal. O tema Sálvora foi composto polos irmáns Pedro e Pablo Pascual, multiinstrumentistas e integrantes do grupo Marful, amais de produtores musicais e creadores dunha longa listaxe de prestixiosas e referenciais bandas sonoras.
A canción Sálvora está interpretada pola cantante galega Guadi Galego, quen tamén participa na composición, e que decidiu sumarse ao proxecto pola historia de mulleres que se conta e polos xeitos de narrala: “Cando vin o filme de Paula Cons recoñecinme, no mar que nos habita, no andar da miña avoa, nos silencios que dicían tanto, na ausencia da caricias e á vez o amor incondicional, nas historias que me contaba cando ninguén a observaba”.
O filme, protagonizado por Nerea Barros, Dario Grandinetti e Aitor Luna, estréase o vindeiro 24 de xullo na plataforma de audiovisual en streaming Filmin.