O sendeirismo pola nosa comarca, con todo o que ofrecen os nosos concellos de riqueza paisaxística e medioambiental, preséntase como unha boa alternativa de lecer deportivo e turístico neste verán de protocolos postCOVID, medidas obrigadas de distanciamento e actividades de formato medio e pequeno. Dende o Concello de Porto Son ofrecen estes días (ao abeiro do programa O Son Camiña) un roteiro co que enxergar a ría de Muros e Noia, boa parte da Serra do Barbanza e o abraiante litoral sonense de cantís, areais, calas, esteiros, castros e vilas mariñeiras. A cita será o 26 de xullo e comeza ás 9.30 (punto de partida) na explanada portuaria de Porto do Son.
Serán 14 quilómetros de percorrido até os montes Enxa e Dordo, con dificultade alta. Co fin de manter a seguridade sanitaria das e dos participantes, o Concello sinala que vai ser obrigatorio o uso de máscaras de protección. O límite é de 60 prazas. Os camiñantes deberán facer todo o posíbel por manter as distancias de seguridade.
Respecto do trazado en si mesmo, o Concello lembra que os montes Enxa e Dordo actúan como soporte desta ruta achegando aos camiñantes dous destacados miradoiros: o do monte Dordo a menor altitude pero que aporta unhas vistas privilexiadas sobre a localidade de Porto do Son, e o do monte Enxa, que nos brinda unha das mellores vistas da ría de Muros e Noia.
O punto de contacto destes dous montes alberga un piñeiral no que destaca o cruceiro de capeliña adicado á Virxe do Leite así como unha necrópole megalítica composta por 3 mámoas.
Quen precise máis datos sobre o roteiro, dicirlle que está habilitada cumprida información na Rede en formato PDF.