O Concello de Boiro comezou os traballos de acondicionamento e humanización da rúa Principal unhas actuacións que se van realizar por treitos e con medios propios, comezando (esta semana) pola contorna do cruce coa avenida de Compostela e a rúa Corrillo, onde se está a acometer un acondicionamento integral do espazo. Máis en concreto, os traballos iniciáronse co cambio de localización da marquesiña para a outra beira da estrada e a substitución da mesma por unha das novas que a administración local solicitou este ano á Consellería de Infraestruturas e Mobilidade da Xunta de Galicia.
Amais, mudou tamén de emprazamento un dos contedores de vidro que ocupaba a beirarrúa e situouse onde están colocados os demais contedores de plástico, papel e residuos orgánicos.
Amais, os operarios de sinalización viaria realizaron o pintado amarelo de todos os bordes das beirarrúas así como o repintado da sinalización horizontal das paradas de autobús en ambas as dúas direccións. Nunha das marxes delimitouse un espazo para o estacionamento de motos e, tamén, reforzouse a sinalización vertical, instaláronse novas macetas con plantas ornamentais co obxectivo de “humanizar e mellorar o entorno da rúa Principal”.
“O obxectivo deste Goberno é o acondicionamento do núcleo urbano e en concreto da rúa Principal e tamén reforzar a seguridade dos viandantes e a mobilidade de vehículos”, afirmou o alcalde. As melloras vanse realizar, como dixemos, por tramos, empezando polo cruzamento coa avenida de Compostela ata chegar á rotonda de Cimadevila por ambos marxes da estrada.
