O Concello de Boiro vén de informar de novos avances ao abeiro do seu esforzo por poñer a punto os centros educativos do termo municipal, con persoal propio e con vistas a conseguir “que estean listos no momento no que se retome a actividade dos mesmos”. Os labores desenvolvéronse durante todo o período do Estado de Alarma e foron obxecto dunha planificación previa cos equipos directivos dos centros docentes. A concelleira de Ensino, María Outeiral, visitou esta semana o CEIP Santa Baia para ver o estado e evolución das obras que se están a levar a cabo no centro.
No CEIP Santa Baia de Boiro estanse a facer tarefas de limpeza e mantemento tanto no interior coma no exterior do centro. Entre os traballos concretos que se levan a cabo inclúese o pintado das aulas e diverso equipamento como as tubaxes da calefacción. Tamén se están a repoñer as antigas luminarias por outras con tecnoloxía LED. Igualmente, realizouse o pintado das pistas deportivas e o acondicionamento dos xardíns de todo o perímetro do patio. Nas vindeiras semanas vanse reparar e acondicionar os teitos dos patios para concluír as tarefas na instalación.
O obxectivo do Concello de Boiro é “que os centros educativos do municipio estean a punto e teñan solucionadas as deficiencias mais importantes e que están na man da Administración local, para cando se retomen as clases o vindeiro curso”.
