A concelleira de Ensino, María Outeiral, visitou este xoves 30 de xullo o centro educativo de Santa María do Castro, en Cabo de Cruz, para comprobar a evolución dos traballos de acondicionamento e as obras que se están a realizar no colexio. Tamén quixo coñecer, de primeira man, as necesidades que están pendentes de atender. Durante a visita estivo acompañada polo conserxe do centro educativo.
As obras forman parte dun proxecto máis amplo do Concello (realizado a través do departamento de obras) para pór a punto todos os centros educativos do termo municipal, con vistas a estar nas mellores condicións posíbeis co inicio do vindeiro curso.Para coñecer as necesidades dos colexios e do seu persoal e profesorado, desde a área de ensino están en contacto cos equipos directivos dos centros.
No CEIP Santa María do Castro o Concello informou de que xa está rematada toda a parte de infantil, onde se colocou a tarima nas aulas, pintáronse as portas e arranxáronse estantes que estaban deteriorados. Na parte de primaria realizouse o pintado das aulas nas que se colocaron as novas xanelas. Realizáronse tamén limpezas xerais e a preparación dos espazos con vistas a cumprir cos protocolos para o vindeiro curso escolar.
A concelleira de Educación aproveitou a súa visita ao centro para ver o estado das obras de colocación do ascensor que está a realizar a Consellería, unha actuación, dixo, “moi necesaria e demandada por toda a comunidade educativa para o centro”.
