O Club Náutico de Boiro – Marina Cabo de Cruz acolleu este venres o acto formal de izado da Bandeira Azul, a Q de Calidade e a de Galicia Calidade. No acto participaron o alcalde de Boiro, José Ramón Romero, o concelleiro de Deportes, Marcos Fajardo e o presidente do náutico, Manuel Fajardo, amais de diversos presidentes de clubs e entidades deportivas do municipio: Antonio Fernandez, da Asociación Cultural de Tradicións Mariñeiras, Changui Ortega, presidente do C.D. Boiro, Daniel Vázquez, presidente do Club de Remo Cabo de Cruz, Óscar López, presidente do Boiro Voleibol, Fabián Fernández, presidente do club de fútbol Cabo de Cruz e Moncho Ares, presidente da Escola de Vela.
A dirección do Club Náutico de Boiro – Marina Cabo de Cruz lembrou que a entidade deportiva conta con prestixiosos distintivos de calidade que o converten “nun dos portos deportivos mellor valorados de Galicia”.
En palabras de Manuel Fajardo, “os devanditos distintivos son un aliciente para seguir medrando e mellorando“. O edil tamén agradeceu a presenza do Concello e dos clubs deportivos locais, xa que “é unha mostra de compañeirismo e amizade”.
Pola súa banda, o alcalde, José Ramón Romero, salientou o traballo do Concello a prol de recuperar instalacións como o Edificio das Colonias na praia de Barraña e “para crear novas dependencias” como a sede do Club de Remo de Cabo, arestora moi avanzadas, ao que cómpre sumar, dixo, o “noso interese par sacar as axudas directas aos clubs e brindarlles apoios, mais aínda nunha situación tan excepcional como é agora despois da COVID”.
