Un total de 60 nenos e nenas de entre 6 e 14 anos desfrutan esta semana dunha nova edición do Depor Campus que se celebra en Boiro. A iniciativa, promovida pola Fundación Deportivo, a Escola de Fútbol Municipal de Boiro e o Concello, celébrase até 24 de xullo (dende hoxe) no campo de fútbol de Valiño.
O alcalde, José Ramón Romero, e o concelleiro de Deportes, Marcos Fajardo, asistiron á primeira xornada para dar a benvida aos cativos e comprobar o desenvolvemento da experiencia deportiva, que este ano vén marcada pola COVID e as esixencias sanitarias para mantela a raia (de aí o aforamento limitado de 60 participantes e a habilitación nas instalacións de todas as medidas de seguridade e protección que esixen os protocolos, como fornecemento de máscaras e de xel).
A actividade serve como unha xornada de convivencia para nenos e nenas da comarca, e tamén para os adultos e directivos dos clubs que os acompañan. Segundo informa o Concello, os obxectivos que persegue esta actividade son, ademais “da tecnificación deportiva con adestradores de primeiro nivel”, os valores que transmite o deporte: “Desde o Concello de Boiro queremos seguir apostando polo deporte, sobre todo polo deporte base, fundamental para que os nenos e nenas do noso pobo medren cos valores que o deporte en equipo nos ensinan”, afirmou o concelleiro Marcos Fajardo.
O alcalde agradeceu a asistencia de todas as persoas que participaron, aínda “tendo en conta a situación actual”.