No mes de agosto a sala de exposicións do Centro Social de Cabo de Cruz vai acoller unha mostra de pinturas da ribeirense Carmen Sampedro, baixo o título Etapas. A artista, natural do barrio de Bandourrío en Ribeira (aínda que afincada dende hai anos en Santiago) é membro do grupo GALEOSKA (Galegos coa Arte) e é colaboradora da AGAEC (Asociación Galega de Arte e Cultura). Ten ás súas costas máis dun centenar de mostras, individuais e colectivas, en pouco máis dun lustro.
En Etapas achega obras cunha variedade de estilos e técnicas pictóricas: realismo, expresionismo ou impresionismo con variedade de materiais como acrílicos, óleo, augadas… A súa máis recente proposta artística vaise poder ver no Centro Social de Cabo de Cruz durante o mes de agosto, en horario de 9.00 a 14.00 horas.
