Para os seareiros da música da comarca e de Galicia, do xoves 6 ao sábado 8 de agosto celébrase a cuarta edición do Festival Noites de Jazz de Rianxo. Haberá concertos e, tamén, unha exposición sobre este estilo musical e as súas diferentes variantes, que tan bos froitos ten dado na nosa terra e tanto nos ten axudado, na pasada crise sanitaria, a sobrelevar os tempos máis críticos do confinamento. A devandita mostra inaugurouse este 24 de xullo, no Centro Sociocultural-Auditorio. Consiste nunha homenaxe pictórico-poética aos camiños de coñecemento, expresión e comunicación (músicos-público) abertos polo jazz. Estamos a falar da exposición Jazz Espido. 17 debuxos de Eva Lloréns e 17 poemas de Mª do Carme Kruckemberg.
A mostra xorde do traballo conxunto, orixinariamente en formato libro (editado por Barbantesa), da poeta viguesa María do Carme Kruckenberg e maila artista Eva Lloréns. Jazz espido cingue textos sobre grandes instrumentalistas e voces do jazz acompañados de espidos masculinos e femininos que “ilustran os movementos e sentimentos dos versos”, segundo reza no resumo orixinario do proxecto, unha colección de “imaxes feitas palabras que expresan a grande admiración da autora pola música do jazz”.
Na presentación deste 24 de xullo participaron Xoán Pastor (director do Museo de Artes do Gravado á Estampa Dixital), Mercedes Queixas Zas (poeta, novelista e política) e Raquel García Abuín (concelleira de Cultura do Concello de Rianxo). Deron a coñecer os detalles, da exposición, do programa de actuacións e, tamén, do espazo en Facebook do certame, onde se van ir dando conta de todas as novidades: https://www.facebook.com/NoitesdeJazz/.
A música en si mesma
A música tomará a palabra entre o xoves 6 e o sábado 8 de agosto, coa cuarta edición do Festival Noites de Jazz de Rianxo. Será no Centro Sociocultural-Auditorio ás 22.30 horas (actividades con reserva previa). O xoves 6 de agosto actuará o Pablo Sanmamed Trío; o venres será a quenda do Pablo Castanho Quartet; e o sábado 8 a protagonista será a Swing Machine Orchestra. Organiza o Concello de Rianxo, que conta coa colaboración da Deputación da Coruña e do Museo de Artes do Gravado á Estampa Dixital (Ribeira).