Ribeira subvencionará a participación da rapazada nos campamentos impulsados por empresas locais

18 Xuño 2020

O Concello de Ribeira anunciou este xoves 18 unha importante medida para aliviar as responsabilidades das familias durante os vindeiros meses, unha carga que se viu agravada dende o inicio do Estado de Alarma coa cancelación da actividade escolar e co confinamento (sen que existise a posibilidade de buscaren axuda, as nais e os pais, noutros membros do núcleo familiar). Favorecer a conciliación laboral e familiar dentro do municipio “ao tempo que se bota unha man ás empresas locais de ocio infantil en tan difíciles circunstancias” é o gran obxectivo da iniciativa presentada este xoves pola concelleira de Cultura, María Sampedro. Trátase de bonificar a participación de nenos e nenas do municipio en campamentos de verán lanzados pola iniciativa privada de Ribeira.

A Concelleira de Cultura, María Sampedro, deu a coñecer esta fórmula que substitúe de maneira excepcional a metodoloxía habitual dos campamentos municipais, cuxos trámites quedaron paralizados pola irrupción da pandemia. Como alternativa, por medio duns bonos de conciliación o Concello subvencionará con 100 euros por alumno e mes (xullo e agosto) aos participantes en campamentos cuxos dous proxenitores (ou proxenitor se son familias monoparentais) traballen, mentres que no resto dos supostos esta rebaixa será de 50 euros ao mes.

Preinscrición

A Concellería de Cultura abrirá o vindeiro luns 22 de xuño un prazo de preinscrición no Centro Cultural Lustres Rivas para que os interesados poidan anotar aos seus fillos e fillas ademais de deixar constancia da antedita situación laboral. Sampedro engadiu que haberá vantaxes extra no caso se seren empregados servizos locais: “Concederanse facilidades para que, de ser necesario, se utilicen instalacións municipais no desenvolvemento destes campamentos, incluso nas parroquias”. A respecto do devandito fixo saber que unha das empresas coas que se contactou vai programar o seu campamento no pavillón de Palmeira, en tanto que a Asociación TDAH levará a cabo un campamento propio na casa de cultura de Aguiño.

Escolas de surf

Outra das iniciativas das que informou María Sampedro ten que ver coas escolas municipais de surf, windsurf e paddle surf, que este verán asume a Concellería de Cultura xunto con Deportes, incrementando o número de prazas. Neste senso, as prazas de surf pasarán de 70 a 100 nunha escola que este ano será desenvolvida Grip Surf School, con base en Corrubedo; e as de windsurf e paddle surf de 40 a 60 prazas en total, correndo a cargo nesta ocasión de Geckos Surf & Sup School, con sede en Ribeira.

Sampedro avanzou que “en próximas datas informará doutras iniciativas nas que se está traballando co mesmo obxectivo de ofrecer alternativas de ocio para a infancia e mocidade do municipio durante a época estival”.

Outros artigos

En Ribeira a rapazada de Banda ó Río estrea un novo parque infantil

O barrio ribeirense de Banda ó Río estrea hoxe un parque infantil completamente renovado. O goberno local, xunto cun bo número de veciños e veciñas, puideron comprobar as novas instalacións de xogo. O investimento para actualizar o Parque de Pedra Pateira ascendeu a...

+

Publicidade

Revista en papel

Opinión

“O Barbanza: Cinco anos de xornalismo independente”

“O Barbanza: Cinco anos de xornalismo independente”

Hai cinco anos, en maio do 2019 nacía na súa edición dixital obarbanza.gal e uns días despois na de papel O Barbanza, sempre en galego e baixo a cobertura do Grupo Código Cero Comunicación. Dicíamos daquela que eramos un grupo de profesionais decididos a aventurarnos...