O grupo municipal do PSdG-PSOE de Ribeira presentou un rogo para o pleno da Corporación no que se require a reparación de urxencia, con vistas á tempada de verán, da varanda de protección do parque da Corna, na parroquia de Palmeira, sobre a praia do mesmo nome. Segundo fai saber a agrupación que coordina José Vilas, a dita estrutura perdeu parte dos elementos da balaustrada que a sustentan, situación que tamén é extensíbel aos bancos do devandito parque, aos que lles faltan varios listóns de madeira.
Os socialistas piden o arranxo dos elementos deteriorados na varanda “antes de que prosiga o seu proceso de deterioro”, e tamén requiren que se corte e acondicione o céspede do parque para que veciñanza e visitantes poidan gozar deste espazo de lecer ao longo dos vindeiros días.
