Sen dúbida unha das grandes imaxes simbólicas da volta á normalidade, unha volta relativa e de obrigadas precaucións, será o regreso das nenas e nenos aos nosos parques infantís. Este luns 15 de xuño, sobre o papel, levantábase en Galicia a prohibición de usalos, pero a medida está a ter unha repercusión desigual nos concellos. No de Boiro o Goberno local anunciou que vai manter pechados estes espazos de lecer “por motivos de seguridade”, e no de Ribeira aprázase a apertura para o 22 de xuño, achegándose unha marxe para o seu acondicionamento e limpeza sanitaria. Polo que respecta a Rianxo, anunciou nun bando municipal que as infraestruturas públicas para as crianzas e a mocidade “irán abrindo progresivamente”, a medida que se proceda a desinfectalas de maneira axeitada e eficaz.
En Boiro, pechados por motivos de seguridade
O Concello de Boiro confirmou este luns que vai manter as cintas de seguridade nos parques até novo aviso. Así se decidiu na Comisión de Seguimento da Evolución da COVID-19, malia que o decreto da Xunta de Galicia para a nova normalidade permitiría a volta á normalidade nos parques infantís, parques biosaudábeis, zonas deportivas, pistas de skate ou espazos de uso público con límite de aforamento e medidas para garantir a distancia interpersoal. O Concello de Boiro decidiu que non se abriran estas infraestruturas até que se vexa claramente como evoluciona a situación epidemiolóxica.
O caso de Ribeira
No caso de Ribeira, a Policía Local colocou carteis nos parques informando que a apertura dos parques infantís e biosaudábeis do municipio está prevista para o vindeiro luns 22 de xuño. No transcurso desta presente semana se perfilará o plan de desinfeccións deste tipo de instalacións, ademais de establecer o aforo permitido en cada un deles.