O concello de Porto do Son recibiu este luns 22 a visita do vicepresidente da Xunta, Alfonso Rueda, quen quixo verificar de primeira man os traballos que se están a levar a cabo no termo municipal para achegar praias seguras ante a COVID, a través de medidas como o reforzamento do persoal de servizo e equipamento (sinalización, alugamento de vehículos) para estas contornas litorais, unha iniciativa de Vicepresidencia á que optou o Goberno sonense.
O vicepresidente destacou “a necesidade de cooperar coas entidades locais” para contribuír á súa recuperación económica tras a paralización da actividade pola COVID-19 e nun sector tan importante como o turístico. Rueda indicou que “este é un bo momento para poñer de manifesto que en Galicia estamos preparando as nosas praias que, sen dúbida son un atractivo para moita xente, para os que vivimos aquí e tamén para moita xente de fóra”.
O vicepresidente lembrou que a día de hoxe arredor de 40 concellos galegos xa presentaron a documentación para fortalecer normas e pautas organizativas, de seguridade e vixilancia e de limpeza e conservación ambiental dos areais para a contención e a prevención da pandemia. Estas axudas están destinadas aos pequenos e medianos concellos co obxectivo de reforzar o persoal que colabore en actuacións de organización e vixilancia de accesos, control de aforamentos ou da permanencia nos areais, así como traballos de limpeza e sinalización.
