O mal querer, da boirense Natalia Carou, preséntase este venres na Feira Virtual do Libro

Esta fin de semana, a partir deste venres 26 de xuño e até o domingo 28, celébrase na Internet un relevante acontecemento que pon de manifesto a importancia da cultura e os libros en tempos de adversidade e, tamén, das novas tecnoloxías para manter viva a chama da cultura e dos libros en tempos de adversidade. Falamos do Festival Virtual do Libro de Galicia (FLIV), cuxa primeira edición nace coa intención de que “o libro e a literatura do país non fiquen parados polas circunstancias que vive o mundo”. A feira comezará abordando de cheo as letras da nosa comarca, acollendo, o primeiro día ás 19.00 horas, a presentación virtual do libro O mal querer da escritora de Bealo (Boiro) Natalia Carou, publicado por Baía Editorial e gañador da segunda edición do Premio de Novela Vilar Ponte de Viveiro.

O mal querer é un dos grandes éxitos literarios galegos da tempada, malia as complexas circunstancias nas que tivo ser presentado e promovido, esta primavera pasada marcada pola COVID-19 e o Decreto de Alarma.

O argumento da novela, para quen non o saiba, xira arredor das vivencias dun adolescente chamado Cibrán Ulloa, un rapaz de dezaseis anos que ingresa nun Centro de Menores acusado dun grave delito cometido contra un compañeiro. Cibrán, fillo dunha coñecida familia de importante influencia económica e social, arrastra un pasado de maltrato doméstico que condicionará de maneira decisiva a súa relación cos demais no colexio, cos profesores e tamén cos compañeiros.

A novela foi cualificada polo xurado do Premio Vilar Ponte do seguinte xeito: “Trátase dunha obra redonda, moi dura, que retrata a sociedade actual onde a violencia, o machismo, a droga, o maltrato, o acoso escolar, a manipulación mediática, os poderes fácticos, e, sobre todo, o desamor ou desafecto se xuntan nun cóctel destrutor no que se ve atrapado o lector”.