A Consellería de Educación vén de facer pública a oferta de Formación Profesional para o curso 2020-2021, unha contribución que serve para consolidar o que se coñece como FP Dual, que é aquela na que tamén as empresas se implican no labor educativo. Nesta modalidade ábrese matrícula en 22 proxectos na provincia da Coruña, tres deles en Ribeira.
A oferta na provincia da Coruña, na que se poderá formalizar a matrícula a partir de hoxe mesmo, contempla 12.326 prazas en primeiro curso en centros públicos (en números moi similares ao curso anterior), en 501 ciclos e programas formativos autorizados.
No referido á FP Dual ofértase un total de 302 prazas (138 en grao medio e 164 en grao superior).
Na listaxe de proxectos de FP Dual que abren matrícula para o vindeiro curso 2020/2021 inclúense como dixemos tres ciclos da nosa comarca, centralizados a través do CIFP de Coroso de Ribeira.,
No seu ciclo Elaboración de produtos alimentarios implícanse as empresas locais Ángel López Soto, Ignacio González Montes e Salica, Alimentos Congelados.
No ciclo Instalación de produtos de calor participarán as seguintes firmas: Alberto Joaquin Sampedro Martínez, Boiresa e Hijos, Comercial Rubel, Eduardo Varela e Hijos, Electro Vidal e Hijos, Foelca Energías, Instalaciones Fontami, Instalaciones Herfer, Jose Manuel Martínez Mariño Multiservicios Riveira, Obras y Servicios Lijó, Satas Barbanza, Socogas e Tecnifon Barbanza.
Pola súa banda, no ciclo superior Mantemento de instalacións térmicas e de fluídos concorren Aluminios Cortizo, Amegrove, Ángel López Soto, Conservas Ria de Arosa, Ignacio Gónzalez Montes (IGNOSA), JJ Chicolino, Porexgal, Tecfrisa Instalaciones e Ingenería.
