O PSdeG-PSOE apostou este luns en Lousame por un novo plan de residuos urbanos alternativo. Fíxoo o vicesecretario xeral dos socialistas e cabeza de lista por A Coruña ás eleccións ao Parlamento galego, Pablo Arangüena, defendendo, nunha visita á Planta de Tratamento de Residuos do Barbanza, unha política de xestión de refugallos “máis adaptada aos estándares europeos”. Na súa visita á planta de Servia, en Lousame, Arangüena estivo acompañado das candidatas ao Parlamento Noa Díaz e Begoña Rodríguez Rumbo, do portavoz municipal do PSdeG Julio Paradela e da deputada provincial Sandra González.
A visita respondeu ao interese do responsábel socialista por “coñecer de primeira man a realidade dun modelo alternativo ao de SOGAMA”, o modelo da Mancomunidade dos Concellos do Barbanza, unha fórmula pola que, segundo fixo saber, “nunca apostou a Xunta de Galicia”. Laiouse ademais de o Goberno galego leve 11 anos “sen mostrar interese pola xestión e o tratamento de residuos”, precisamente cando a realidade impón un “cambio de rumbo acorde coa economía circular a transición ecolóxica”.
O candidato socialista defendeu o modelo de xestión da planta de Lousame, que “cremos que pode encaixar nun novo sistema de residuos de Galicia”, e lamentou que “sexa atacada por un PP ao que lle estorba por unha proposición sectaria, que prefire ignorar cando non estrangular estas instalacións”.
Tamén alertou de que a crise da COVID-19 “evidenciou un sistema de xestión de residuos caótico”, derivado “da escaseza de plantas de tratamento que teñen desbordada a SOGAMA, actualmente un vertedoiro moi lonxe de ser un modelo axeitado para afrontar unha transición enerxética”.
