O noso país entrará en fase 3 a partir do próximo luns 8 de xuño. Nesa data, a Xunta de Galicia comezará a xestionar xa as medidas de desescalada. Diso informou este venres o ministro de Sanidade, Salvador Illa, na rolda de prensa posterior á reunión do Consello Ministros no que se deu luz verde á última prórroga do estado de alarma.
O Goberno permite que sexan os presidentes dos gobernos autonómicos os que dirixen a mobilidade no interior de cada comunidade. É por iso que se prevé que a Xunta autorice aos galegos moverse entre as catro provincias. O presidente da Xunta de Galicia, Alberto Núñez Feijóo, afirmou que espera que o Goberno central clarifique cales serán as competencias exactas das autonomías para poder activar a mobilidade libre en todas as provincias galegas.
